प्रेम कसं करावं?
सर्वांसमोर सवाल आहे
उत्तर त्याचे आज मी
हळुवारपणे देणार आहे ।।१।।
प्रेम करावं चंद्रासारखं…
अंधार्या रात्रीवर भाळून
हळूहळू तिच्या जवळ जावं
तिच्याशी एकरूप व्हावं
स्वतःचं अस्तित्व विसरून
अंधारच बनून उरावं ।।२।।
रात्रीनेही स्वतःचं रूप
चंद्राच्या प्रकाशात पहावं
सौंदर्याने त्याच्या भारावून जाऊन
आयुष्य आपुलं उजळवून टाकावं ।।३।।
एकमेकांनी मग एकमेकांना
एकमेकांच्या साक्षीने शोधावं
एकमेकांना ओळखत ओळखत
प्रेम करत राहावं ।।४।।
चंद्राने आपुल्या शीतल प्रकाशात
रात्रीला न्हाऊ घालावं
कधी रात्रीने चंद्राला आपुल्या
काळ्याशार बाहूत घ्यावं ।।५।।
मिलनाचं हे सत्र
सृष्टीअंतापर्यंत सुरूच राहावं
एकमेकांना ओळखत ओळखत
प्रेम करत राहावं ।।६।।
© copyright
डॉ. राहूल रजनी
Mob. No. 9623092113